لولا الله الواحد ثم الزيـن ياسعـود
انك على الشاشه تشوف انحرافـي
لكـن يمنعنـي مواثيـق وعهـود
ومن قبلها ربي يشـوف ونخافـي
لا شفت لي غضً غضيضً ومقرود
عضيت عينـي معلـنً بنصرافـي
الفتنه القشراء لها البعـد وصـدود
هاذيـك اسميهـا سنيـنً عجافـي
والا اليا منه طـرى ليـن العـود
حب النقا بين العشاشيـق صافـي
هاذيك تجذبني بـلا عـد وحـدود
لان الهوى من بين الاحباب وافـي
ثوب الشرف والطهر والعز والجود
دايـم اسميهـا بثـوب العفـافـي
من غير زينً فيه والزيـن مشهـود
بالذكـر والا زينهـا مـا يشافـي
ما شافه السائق ولا الورع والعـود
مـا شافـه الا لابسـات الغدافـي
وقالوا لنا عنها بها الزين بـه زود
اختصه الرحمـن زيـنً اضافـي
ابو عيونً سود ورمـوش وخـدود
وخصراً وردفً والثمان الرهافـي
اصبحت في حبه مولـع وملهـود
يالله لا تكتـب عليـنـا تجـافـي
وان كان حبي ذنب فالذنب محمـود
اجمل ذنوبي والخطـاء واقترافـي
تسوى جميع البيض والسمر والسود
الكـم اسجـل بالقصيـد اعترافـي
موضوع: لولا الله الواحد ثم الزين ياسعود .... انك على الشاشه تشوف انحرافي 
الأربعاء أكتوبر 08, 2008 5:11 pm
